Sunday, August 30, 2009

பாஸ்தா செய்வது எப்படி - சமையல் குறிப்பு

முன் குறிப்பு: இந்த சமையல் குறிப்பு திருமணமான ஆண்களுக்கு மட்டும். மற்றவர்கள் வெறுமனே படிப்பதோடு நிறுத்திக் கொள்ளவும். செய்து பார்க்கத் துணிய வேண்டாம்.

முதலில் பாஸ்தா பற்றிய சிறு குறிப்பு:
பாஸ்தா என்பது நம் சோனியா காந்தி நாட்டினர் கண்டுபிடித்த ஒரு உணவு. நம் ஊர் சேமியாவின் ரெண்டு விட்ட அக்கா. பாஸ்தா மைதா அல்லது கோதுமை மாவு மற்றும் தண்ணீர் கலந்து செய்யப்படுகிறது. மற்ற மாவுகளிலும் செய்யலாம்.

பாஸ்தா பல வடிவங்களில் கிடைக்கிறது. மிகவும் பிரசித்தி பெற்ற வடிவங்கள் ஸ்பகட்டி, மக்கரோனி, ஃபுஸ்ஸிலி ஆகியவை. பாஸ்தாவில் க்ளுட்டன் எனப்படும் மாவுச்சத்து அதிகமாக இருப்பதால் கொலஸ்ட்ரால் உள்ளவர்களுக்கு இது உகந்தது அல்ல.

இப்போது பாஸ்தா சமைக்க தேவையான பொருட்கள்:
பாஸ்தா - 2 கப்
தண்ணீர் - 4 கப்
சுகினி - 1
காளான் - 10
வெங்காயம் - 1
ஸ்பினாச் (கீரை) - 1 கட்டு
ஆலிவ் எண்ணை - 2 மேஜைக்கரண்டி
பாப்ரிகா - 1 மேஜைக்கரண்டி
சீஸ் (துருவியது) - 2 மேஜைக்கரண்டி
பாஸ்தா சாஸ் - 2 மேஜைக்கரண்டி
முக்கியமான இரண்டு பொருட்கள் (இவற்றைப்பற்றி கடைசியில் சொல்லப்படும்)

சில பொருட்களை வாங்கக் கூடிய இடங்கள்:
பாப்ரிகா உங்கள் ஊரில் உள்ள பலசரக்கு கடையில் கிடைக்கும். ஸ்பைசஸ் அல்லது ஹெர்ப்ஸ் என்ற பிரிவில் இது கண்டிப்பாக கிடைக்கும். ஆனால் கொஞ்சம் விலை கூடுதலாக இருக்கும். ஆதலால் ஒவ்வொரு முறை பிஸ்ஸா ஹட்டுக்கு செல்லும்போதும் கை நிறைய பாப்ரிகா பாக்கட்டுகளை அள்ளிக் கொண்டு வந்து விட்டால் கவலை இல்லை.

பாஸ்தா சாஸ் - உங்கள் ஊர் பலசரக்கு கடையில் இத்தாலிய பிரிவு என்று ஒன்று இருந்தால் அங்கே இருக்கும். இல்லையென்றால் பாஸ்தா பிரிவில் இருக்கும். பிஸ்ஸா ஹட்டில் பிஸ்ஸா ஆர்டர் கொடுக்கும்போது எக்ஸ்ட்ரா பிஸ்ஸா சாஸ் கேட்டீர்கள் என்றால் டப்பாவில் கொண்டு வந்து கொடுப்பார்கள். அதையே ஃப்ரிட்ஜில் வைத்திருந்து உபயோகப் படுத்திக் கொள்ளலாம்.

இப்போது செய்முறை:
முதலில் அடுப்பைப் பற்றவைத்துக் கொள்ளவும். பின் வாய் அகண்ட ஒரு பாத்திரத்தை வைத்து அதில் 4 கப் தண்ணீரை ஊற்றவும். தண்ணீர் கொதிக்கவும் அதில் 2 கப் பாஸ்தாவைப் போடவும். தேவையான அளவு உப்பையும் சேர்த்து, அவ்வப்போது கிளறி விட்டு பாஸ்தா வெந்தவுடன் தண்ணீரை வடிகட்டிவிட்டு பாஸ்தாவை எடுத்துவைத்துக் கொள்ளவும்.

பாஸ்தா வெந்து கொண்டிருக்கும்போதே எல்லாக் காய்கறிகளையும் சின்ன சின்னதாக வெட்டிக் கொள்ளவும். ஒரு வாணலியில் இரண்டு கரண்டி ஆலிவ் ஆயில் ஊற்றி காய்கறிகள் அனைத்தையும் போட்டு நன்றாக வதக்கவும். தேவையான அளவு உப்பு போட்டுக் கொண்டு ஒரு மேஜைக்கரண்டி பாப்ரிக்காவையும் போட்டு நன்றாக வதக்கவும். காய்கறிகள் வதங்கியதும் வேகவைத்த பாஸ்தாவை அதில் போட்டு நன்றாக கிளறவும். ஒரு நிமிடம் கிளறியதும் பாஸ்தாவை எடுத்து ஒரு கிண்ணத்தில் போடு அதன் மேல் சீஸையும் பாஸ்ட்தா சாஸையும் போட்டு விட்டீர்களென்றால் பாஸ்தா ரெடி.

பின் குறிப்பு: மேலே செய்த பாஸ்தாவை தங்கமணிக்கும் குழந்தை(களு)க்கும் கொடுத்து விட்டு, ஃப்ரிட்ஜில் இருக்கும் நேற்று வைத்த சாதத்தையும் முந்தா நாள் வைத்த புளிக்குழம்பையும் (அதாவது முக்கியமான அந்த இரண்டு பொருட்களையும்) மைக்ரவேவில் வைத்து சூடு பண்ணிக்கொண்டு அதை சாப்பிட்டு மகிழவும் (அப்புறம் இந்தக் கண்ணறாவியல்லாம் யாரு சாப்புடுறது?)

9 comments:

sarath said...

கடைசி வரி சூப்பர்.

இந்த கன்றாவிய யார் சாப்டறது?

Anonymous said...

என்ன இருந்தாலும் புளிக்குழம்பு ருசி பாஸ்தாவுக்கு வருமா? எனக்கும் பாஸ்தா அவ்வளவா பிடிப்பதில்லை.

sarath said...

பழைய சோற விடவா இந்த பாஸ்தா
ருசி ?

Unknown said...

சரத்
சின்ன அம்மிணி
- வருகைக்கு நன்றி.

நம்புவிங்களோ நம்ப மாட்டிங்களோ, நான் இன்னமும் பழய சோறு தான் ப்ரேக்ஃபாஸ்ட்க்கு.

sarath said...

முகிலன்,

கொடுத்து வச்சவர் நீங்க!

குடுகுடுப்பை said...

பாஸ்தாவெல்லாம் வேலைக்கு ஆவாது,
சோறு, கறி , மீன் , கருவாடு
இதான் நமக்கு ஆவும்

குடுகுடுப்பை said...

உங்க பதிவு ரீடர்ல வரமாட்டேங்குது ஏன்?

Unknown said...

ரீடர்னா என்னங்க்ண்ணா?

Unknown said...

கூகுள் ரீடரை சொல்றீங்களா? எங்க தங்கமணி ரீடர்லயெல்லாம் வருது. என்ன பிரச்சனைன்னு தெரியலையே